PSE-EE PSOE Socialistas Vascos

Azken txanpan sartu da Euskararen XI. Maratoia. Lasarte-Oria bi jardunaldi trinko bizitzeko prestatzen ari da datorren urriaren 17an eta 18an, adin guztietako publikoari zuzendutako eta euskaraz gozatzeko, partekatzeko eta bizitzeko pentsatutako egitarau zabalarekin.

Programazioa prentsaurrekoan aurkeztu dute Lasarte-Oriako alkate Agustin Valdivia Calvok; Euskara zinegotzak; Ttakun Kultur Elkarteko bi ordezkarik (Udalarekin batera Maratoia antolatzen duen erakundea).

Valdiviak antolakuntzan parte hartu duten pertsona guztiek azken hilabeteetan egindako lana aitortu nahi izan du. Maratoiko lantaldeak, Zortzikoteko kideak eta herriko hainbat eragile “ahalik eta osatuena eta anitzena” izatea helburu duen programazioa prestatzen ari dira iaztik. Alkateak bere inplikazioa eskertu du eta Udalak Maratoian zehar garatuko diren ekimenetan laguntzeko duen prestutasuna berretsi du.

Bi eguneko jarduera kale eta plazetan

Egitarauak askotariko proposamenak bilduko ditu asteburu osoan zehar: txupinazoa, kalejirak, diana, herriko ikastetxe eta eragileen emanaldiak, azokak, txarangak, dantza, bertsolariak, magia, haurrentzako ikuskizunak, musika eta gaueko jarduerak.

Larunbatean, hilak 17, goizeko 08:00etan hasiko da txupinazoarekin. Ondoren, irekiera ekitaldia, diana eta tokiko kultur sortzaileei eskainitako gunea izango dira. Goizean zehar txokolatada, ikastetxeetako emanaldiak eta baserritar eta sortzaileen azoka izango dira. Eguerdian, Arranopola Txarangak eta Aristerrazu Txikik Kale Nagusia hartuko dute, 14:30ean euskal paellarekin egingo den bazkariaren aurretik.

Arratsaldeak bere erritmoari eutsiko dio proposamen ugarirekin, besteak beste, Emakumeen Etxearen parte-hartzea, Transmaribollo protokoloaren aurkezpena, euskaltegietako ordezkariak, Musika Eskolako emanaldiak, Zabaletako dantzak, Kukukako haurren parte hartzea, magia eta Takolo, Pirritx, Porrotx eta Marimotototsen ikuskizuna herriko elkarteekin batera.

Musika eta animazio proposamen ezberdinek jarraituko dute gauean zehar, besteak beste, DJ sorpresa, Alboka-Erketz_Zero, Piztu TB Show, Elektropottotte, Noisemarkers eta Zu bai artista karaokea.

Igandean, festak aurrera jarraituko du

Asmo horrekin, igande goizean Okendo plazan Esnatu! Kafe-tertulia, topaketarako eta hausnarketarako gunea, non tokiko eragileek eta herritarrek euskararen inguruan dituzten esperientziak partekatu ahal izango dituzten. Antolatzaileek taldeetan parte hartzera animatzen dute, aldez aurretik Udalaren eta Ttakun Kultur Elkartearen webguneetan izena emanda.

Modu paraleloan, Kale Nagusiak Bizipoza azoka, Xumela Abesbatzaren emanaldia eta erraldoi eta buruhandien kalejira hartuko ditu igande goizean. 14:30ean bazkaria izango da eta, arratsaldean zehar, bertsolarien finala, Oaintxe in deu show, Bizipoza Jaia eta euskarara hurbildu diren belaunaldi ezberdinei aitortza egingo diete.

Maratoiaren azken txanpan, besteak beste, plaza dantza, Samba badago eta Aire Eire arituko dira, baita afaria, bazkalosteko ekintzak eta Kukukaren urteurrenaren ospakizuna ere, hamaikagarren edizioari amaiera emango dion ekitaldiaren aurretik.

Udalak eta Ttakun Kultur Elkarteak herritarrak animatu nahi dituzte programazioa ezagutzera eta, batez ere, bi egunetan aktiboki parte hartzera. XI Euskararen Maratoiak euskaraz bizitzeko, gozatzeko, elkarrekin egoteko eta elkarrekin hausnartzeko espazio irekia eskaini nahi du berriz ere.

Aurreko edizioetan bezala, bi egunetan bazkari eta afariak Okendon egiteko aukera egongo da. Bazkarirako txartelak urriaren 6an jarriko dituzte salgai Ttakun Kultur Elkartean. Antolatzaileek sare sozialen bidez emango dute laster eskuratzearen inguruko xehetasunen berri.

Urriaren 17an eta 18an “Piztu! Sugarra gu gara” lelopean Lasarte-Oriako kale eta plazak beteko dira berriro.

Asteburutik harago joan nahi duen festa

Aurkezpenean zehar, nabarmendu dute Euskararen Maratoiaren helburua ez dela soilik bi eguneko ospakizun handi bat izatea, baizik eta Lasarte-Orian euskararen erabilera bultzatzeko eta indartzeko urte osoan zehar egiten den lanari jarraipena ematea.

Alde horretatik, Maratoia Aroan txertatzen da, 2026-2030 aldirako esparru estrategikoan, Udaleko Euskara Zerbitzuaren eta herriko eragile desberdinen arteko elkarlanaren emaitza. Helburua da Maratoian sortutako esperientziek eta hausnarketek jarraipena izatea eta datozen urteetan garatuko diren lan-ildoak elikatzea.