partekatu
• LIBURU BABY KLUBA
Parte-hartze arrakastatsuaren ondoren, Liburu Baby Kluba larunbatero zabalduko da
Ekimena 0 eta 3 urte bitarteko haurrei eta haien familiei zuzenduta dago, eta irakurketaren sustapena indartzen du.
Lasarte-Oriako Udalak Liburu Baby Kluba programa larunbatero zabaltzea erabaki du, 2023an abian jarri zenetik izandako harrera bikaina eta parte-hartze maila altua ikusita. Etapa berri honetako lehen saioa otsailaren 7an, larunbata, izango da, eta ekainera arte luzatuko den egutegi bati hasiera emango zaio.
Orain arte, hilean bi saio egiten ziren, baina familiek harrera ona egin dietenez, maiztasuna handitu egin da eta ekimena asteko hitzordu egonkor gisa finkatu da.
Liburu Baby Kluba jarduera ludiko, didaktiko eta doakoa da, 0-3 urte bitarteko haurrei zuzendua. Pertsona heldu batek lagunduta parte hartzen dute beti, eta pertsona hori ere esperientziaren parte aktiboa da. Liburua da saioen abiapuntua eta ardatz nagusia, eta helburu nagusia da txikitatik literaturarekiko, musikarekiko, artearekiko eta naturarekiko interesa sustatzea.
Jarduera larunbatero egiten da, 11:00etan, Lasarte-Oriako Udal Liburutegian, eta euskaraz, gaztelaniaz eta ingelesez egiten da, familientzako ingurune irisgarria, inklusiboa eta hurbila bultzatuz.
Mestiza Elkarte Artistiko-Soziokulturalak bultzatutako Bookstart Euskadi-Gipuzkoa irakurzaletasuna sustatzeko ekimenen barruan dago programa. Proiektu honi esker, urtero liburu sorta bat jasotzen dute doan parte hartzen duten haurrek, jaiotzetik irakurzaletasuna, abestiak eta errimak pizteko asmoz.
Liburu Baby Kluba, gainera, kultura anitzeko ekimena da, euskal kultura sustatzen duena eta familiak munduko kultura desberdinetara hurbiltzen dituena, aniztasuna, elkarbizitza eta partaidetza komunitarioa bezalako baloreak indartuz.
Jarduerak Gipuzkoako Foru Aldundiko Kultura, Lankidetza, Gazteria eta Kirol Departamentuaren eta Leer Transforma Haur eta Gazteen Irakurzaletasuna Sustatzeko Estatuko Sarearen babesa du, eta Udalak sustatzen du zeharka, Gizarte Zerbitzuak, Berdintasuna, Garapenerako Lankidetza, Osasuna eta Kultura arloen bitartez.
Udalak familia guztiak animatu nahi ditu ekimen honetan parte hartzera, Lasarte-Oriako gizarte- eta kultura-sarea sendotzen laguntzen baitu, eta udal-liburutegia lehen haurtzarotik hezkuntza- eta kultura-akonpainamendurako erreferentzia-gune gisa sendotzen.
