partekatu
• OPORRAK BAKEAN
Lasarte-Oriak Oporrak Bakean programarekin duen konpromisoari eusten dio, errealitate berri batera egokituz
Ekainaren 30etik aurrera, Saharako bost haurrek herrian igaroko dute uda, Udalak Tolosaldea Sahararekin batera bultzatutako formula berri bati esker.
Ekainaren 30ean, bost haur saharar Lasarte-Oriara iritsiko dira Oporrak Bakean programaren barruan. Ekimen solidario horri esker, urteak dira saharar errefuxiatuen kanpalekuetatik datozen adingabeek basamortuko baldintza gogorretatik urrun igaro ditzaketela aste batzuk.
Tolosako Tolosaldea Sahararekin elkartearekin elkarlanean garatzen den programa honek, harrera familien inplikazioari esker funtzionatu izan du betidanik, udako hilabeteetan euren etxeetako ateak irekitzen baitzituzten. Hala ere, konpromiso hori hartzeko familia gutxiago zeudenez, gero eta zailagoa zen ohiko formatuari eustea, eta formula berriak bilatu behar ziren beharrezkoa izaten jarraitzen duen ekimen baten jarraipena bermatzeko.
Egoera honen aurrean, Lasarte-Oriako Udalak, Garapenerako Lankidetza arloaren bitartez, proiektua bizirik mantentzea ahalbidetuko duen eredu aldaketa erraztea erabaki du.
Lourdes Acevedo Beldarráin Gizarte Zerbitzuetako, Berdintasuneko, Garapenerako Lankidetzako eta Osasuneko zinegotziak azpimarratu duenez, «garrantzitsuena zen formula bat aurkitzea Saharako haurrei aukera hori eskaintzen jarraitzeko. Ez genuen nahi antolaketa zailtasunek halako programa baliotsu bati amaiera ematea».
Horretarako, Udalak 10.000 euroko diru-ekarpena egingo du, bost adingabeen joan-etorriak, udan egiten duten egonaldia eta komunikazioa eta laguntza errazteko behar diren itzulpen-zerbitzuak ordaintzeko.
Gainera, Lasarte-Orian egongo diren bitartean, Udalak udal etxebizitza bat jarriko du programaren esku. Bertan, hainbat begirale egongo dira, euren eguneroko zaintzaz arduratuko direnak eta datozen asteetan egingo dituzten jarduerak antolatuko dituztenak.
Egonaldiaren barruan sartuko dira, baita ere, udal kiroldegiko instalazioetara doan sartzeko aukera eta Udako Udal Txokoetan parte hartzea, herriko beste haurrekin bizikidetza bultzatuz.
Tolosaldea Sahararekin Elkartetik, bere ordezkari Elixabet Eizagirre Gilek gogorarazi du uda honetan 40 urte beteko direla Oporrak Bakean ekimenean parte hartu zuten lehen haurrak Gipuzkoara iritsi zirenetik eta 50 urte saharar herriaren erbestetik. «Inoiz bete beharko ez liratekeen» urteurrenak direla adierazi du, saharar herriak bere etorkizuna libreki erabakitzeko eta bere lurraldera itzultzeko duen eskubidea aldarrikatuz. Era berean, nabarmendu du programa aldi baterako izateko bokazioarekin jaio zela, baina egungo egoerak irauten duen bitartean Oporrak Bakean bezalako ekimenak bultzatzen jarraituko dutela, Lasarte-Oriako Udalaren eta herritarren babesa eskertuz. Azkenik, adingabeek herrian uda ahaztezina igarotzeko eta bi herrien arteko elkartasun loturak indartzeko nahia adierazi du.
Garapenerako Lankidetza arlotik gogorarazi dute Oporrak Bakean oporraldi soil bat baino askoz gehiago dela. Haur horietako askorentzat, aukera ona da zenbait astez muturreko tenperaturetatik aldentzeko, udan 50 gradutik gora egoten baitira kanpamentu sahararretan, elikadura orekatua izateko, osasun-azterketak egiteko eta edozein adingaberen bizitzaren parte diren eguneroko esperientziez gozatzeko.
Aldi berean, programak aukera ematen du herritarrei Saharako herriaren errealitatea hurbiltzeko eta kulturen arteko elkar ezagutza sustatzeko, ekimen hau inspiratzen duten elkartasun eta lankidetza balioak indartuz.
Egokitzapen honekin, Lasarte-Oriak, aldaketak aldaketa, elkartasun espiritua bere horretan mantentzen duen proiektuarekin kolaboratzen jarraitzeko borondatea berresten du.
