partekatu
• IMANOL LIZARDI SARIA
Hegoi Amabizka bizkaitarrak irabazi du Imanol Lizardi Sariketaren lehen edizioa
Sormen eta talentu erakustaldi bat bizi izan zen.
oan den ostiralean, azaroaren 29an, Hegoi Amabizka gazte bertsolariak irabazi zuen I. Imanol Lizardi Sariketa, Villa Mirentxuko aretoan ospatutako lehiaketan. Lasarte-Oriako Udaleko Euskara Zerbitzuak eta Ttakun Kultur Elkarteak antolatu zuten ekitaldia, Earra! bertso eskolaren laguntzarekin. Euskal Herriko hainbat lurraldetako sei bertsolari gazte bildu ziren bertan.
Parte-hartzaileak honakoak izan ziren: Maddi Lasa Ormazabal eta Aratz Arzelus Aranburu Gipuzkoatik; Iraide Onaindia Elexpuru eta Hegoi Amabizka Gamiz Bizkaiatik; Kelmene Abaitua Isaszelai eta Kattalin Lizarraga Mendia Nafarroatik. Ordu eta erdi inguruan, gazteek beren sormena eta talentua erakutsi zituzten inprobisazio eta bertso-proba ezberdinetan. Lehia estu baten ondoren, Kelmene Abaituak bigarren postua lortu zuen, eta Hegoi Amabizka irabazle izendatu zuten. Irabazleak 400 euroko saria, oroigarri bat eta zapi oroigarri bat jaso zituen.
Ekitaldian parte hartu zuten, besteak beste, Jon Antxordoki Euskara zinegotziak, Mari Karmen Ormazabal Ttakun KEren lehendakariak eta Ana Eizmendi, Imanol Lizardiren alargunak. Aurkezpena Aizpea Garmendiak gidatu zuen, bertsolarien jarduera fase guztietan zehar.
Imanol Lizardi Sariketa Bertso Astearen barruan kokatzen da, euskal kultura sustatzeko eta iaz 65 urterekin zendu zen Imanol Lizardi bezalako pertsonaia garrantzitsuak omentzeko ekimena. Sariketa honek bertsolaritzaren artea ospatzeaz gain, Lasarte-Oriako nortasun kulturala eta euskararekiko konpromisoa indartzen ditu.
Lasarte-Oriako Udaletik, zorionak ematen dizkiogu Hegoi Amabizkari merezitako garaipenagatik eta eskerrak parte-hartzaile eta antolatzaile guztiei ekitaldi hau gauzatzeko egindako lan eta esfortzuagatik. Espero dugu Imanol Lizardi Sariketa gure udalerriko kultura-agendan ezinbesteko hitzordu bihurtzea.
Informazioa: Lasarte-Oriako Udala
