partekatu
• AZKORTEKO ERROMERIA
Azkorteko Erromeria igande honetan itzuliko da udalerriko ohiturarik errotuenetako bat bizirik mantentzeko
Ekitaldia Ttakun Kultur Elkarteak antolatu du Udalaren laguntzarekin, eta maiatzaren 10ean izango da
Lasarte-Oriako Udalak Azkorteko Erromeriaren edizio berria aurkeztu du gaur goizean. Prentsaurrekoan Txus Alonso Ocariz Jaietako zinegotziak eta Arkaitz Illarramendi Sarabiak parte hartu dute, ekitaldia antolatzen duen Ttakun Kultur Elkartearen izenean.
Agerraldian zehar, bi aldeek ekimen honek herriko jai egutegian duen garrantzia azpimarratu dute, kultur ondarearen adierazpen gisa eta belaunaldien arteko topagune gisa duen balioa nabarmenduz. Erromeriak Udalaren babesa du, Ttakunekin duen lankidetza-hitzarmenaren bidez. Ttakun funtsezko eragilea da udalerriko kultura-tradizioak bultzatzeko eta zaintzeko.
Jaietako zinegotziak “Ttakun bezalako elkarteen etengabeko lana” nabarmendu du, “Azkorteko Erromeria bezalako ohiturak bizirik mantendu eta Lasarte-Oriaren identitatearen parte aktibo izan daitezen”, eta aldi berean herritarrak animatu ditu jai egun honetan parte hartzera.
Arkaitz Illarramendik, bere aldetik, erromeriaren helburu nagusia “ohitura hau herritar guztiei, batez ere belaunaldi berriei, transmititzen jarraitzea” dela nabarmendu du, aurreko edizioetan arrakasta erakutsi duen programazio sendoari eutsiz.
Eguneko egitaraua
Azkorteko erromeriak bere ohiko egiturari eutsiko dio, eta ordutegian aldaketa txiki batzuekin bada ere, jardueraz beteriko goiza eskainiko du:
- 10:30 – Tabernaren irekiera (salda, txorizo egosia eta edariak)
- 10:45 – Erromeria trikitilariekin (Lierni Arozena eta Olaia Rekondo)
- 12:15 – Herri kirolak:
- Harrijasotzailea: Beñat Telleria
- Aizkolariak: Araz Mugertza eta Julen Gabirondo
- 13:15 – Meza Alboka abesbatzarekin
- 14:30 – Tabernaren itxiera
Antolatzaileek eta Udalak Azkortera hurbildu eta musika, herri kirola, gastronomia eta tradizioa ingurune paregabe batean uztartzen dituen gozatzera gonbidatzen dituzte herritarrak.
